Mango Farmers Market sa siyudad gibuksan

CEBU, Philippines — Gibuksan na dili pa lang dugay sa  Cebu City Agriculture Department (CAD) ang Mango Farmers’ Market nga nahimutang diha sa Gen. Maxilom Avenue, Cebu City.

Gilangkoban kini sa mga presko nga prutas ug utanon nga nag-gikan sa Barangay Tabunan ug aduna usab kini mga ornamental plants. Abli kini gikan sa Huwebes ngadto sa Sabado.

Nasayran nga nauso na karon ang gitawag og mga “plantita ug plantito”, mga tawo kini nga kusog kaayo mangolekta og tanum.

Malaumon ang CAD nga suportahan kini sa publiko sanglit mga produkto gyud kini sa siyudad. Nasayran nga subsob karon sa pag-hatag og tabang ingon man sa ilang mga programa ang CAD alang sa mga mag-uuma.

Dili pa lang dugay, nag-apod apod na ang maong departamento og libreng seedlings nga gilangkoban sa forest ug fruit trees,ornamental, herbal ug vegetable seedlings.

Hinoun dunay limit sa gidaghanon sa ihatag aron maapod apod kini og tarong ngadto sa mga nagtinguha nga mananom. —MEL (BANATNEWS)