Barangay health workers sa Bogo hatagan og honorarium

CEBU, Philippines — Gipaabot nga makadawat og tag P800 nga monthly honorarium ang mga barangay health workers sa siyudad sa Bogo.

Kini human nga ang Sangguniang Panlungsod sa maong dakbayan nipasar sa ordinansa nga nag tinguha sa paghatag og monthly honorarium sa maong mga kawani sa barangay.

"Gamay lang kini nga agig pasalamat sa Dakbayan sa Bogo sa mga kakugi ug pagpaninguha sa atoang mga BHWs kansa atoa gyud nga nakita ang tiunay nga pagpanerbisyo labi na gyud sa panahon sa pandemya" pagbasa sa post sa City Government of Bogo facebook page.

Ang maong ordinansa gipangamahanan kini ni Bogo City Vice Mayor Maria Cielo Martinez.

Hinoon kinahanglan pa nga aprobahan sa mayor ang maong ordinansa.

Nipasar usab og resolusyon ang konseho sa Bogo paghatag og honorarium sa mga purok president didto sa siyudad. "Dako nga abag sa dakbayan ang atuang mga purok presidents aron nga padayon sab nga ma-improve ug maplantsa pa gayud ang atuang Purok System nga gamit kaayo labi na sa emergency situations ug data gathering aron madali ang pagpaabot sa mga serbisyo ug programa ngadto sa mga Bogohanons" pagbasa sa facebook post sa Bogo City Government. (BANAT NEWS)