25 mil ka pasahero na-accommodate sa CPA
CEBU, Philippines — Sulod sa buwan sa Agosto niining tuiga ang Cebu Port Authority (CPA) naka- accommodate na kini og 25 mil ka pasahero nga pagawas ug pasulod sa Dakbayan sa Sugbo.
Kini ang gitug-an ni Maryknoll Lague, CPA public relations officer nga nahinabi sa Banat News.
Matud ni Lague nga ang mga pasahero naglangkub sa mga Locally Stranded Individuals (LSI), Authorized Person Outside Residence (APOR) ug mga Overseas Filipino Worker (OFW).
Nikabat ngadto sa 7,313 ang mga pasahero nga nangabot gikan sa laing lugar ug niabot ngadto sa 14,729 ang mga pasahero nga nigawas sa Sugbo.
Gitug-an ni Lague nga tanang mga pasahero nga nigawas ug nisulod adunay mga travel documents nga ilang gipresentar.
Ang mga pasahero gikan ug padulong kini sa mga lugar sa Cagayan, Hilongos, Tagbilaran, Manila, Surigao ug sa ubang bahin pa sa Visayas, Mindanao ug kaulohan.
Padayon gihapon ang CPA nga modawat sa mga pasahero nga mosulod ug mogawas sa mga terminal sa Sugbo basta aduna kini mga dokumento nga ikapakita. /BDB (BANATNEWS)
- Latest