Talisaynon ug Oponganon nakasabot na sa sitwasyon

CEBU, Philippines — Gipahibawo sa hepe sa kapolisan sa Dakbayan sa Talisay nga walay kausaban ang pagpatuman sa protocols alang sa mga tawo nga manggawas sa ilang panimay samtang padayon nga gipaubos sa general community quarantine (GCQ) ang  siyudad.

Matud ni Police Major Gerard Ace Pelare nga hinay-hinay na nga nakasabot ang mga Talisaynon sa sitwasyon nga naa pa ang pandemiya.

Giingong ang nausab lang karon mao ang pagdagsa sa daghang sakyanan nga moagi diha sa siyudad paingon ngadto sa habagatan.

Giklaro ni Pelare nga padayon ang ilang pagpatuman sa safety protocols apan adunay pipila ka mga badlongon nga dili motuman.

Gihangop ni Pelare nga nikunhod na ang gidaghanon sa mga tawo nga ilang nadakpan nga nakalapas sa protocols ug nagpasabot kini nga naminaw sa ilang hangyo ang katawhan.

Ang kapolisan padayon kini sa pagpahigayon og mga checkpoint diha sa mga lugar sa siyudad lakip na ang rekorida matag adlaw pagpahimangno sa mga tawo aron malikay sila sa virus.

Sa laing bahin, gikatahong 50 porsyento sa mga residente sa Dakbayan sa Lapu-Lapu ang nagpakabana na karon sa GCQ.

Kini ang gitug-an ni Police Colonel Clarito Baja, hepe sa Lapu-Lapu City Police Office

Matud ni Baja nga base sa ilang assessment ug sa gidaghanon sa nadakpan nga nakalapas sa protocols sugod niadtong Agosto 1, 2020 nabantayan nga ang mga residente sa lugar nakasabot na kini sa sitwasyon diin ang siyudad ubos sa GCQ.

Kini tungod sa kanunay nga pagpahimangno sa kapolisan ngadto sa katawhan aron sila malikay sa COVID-19. Rowena D. Capistrano/BDB (BANATNEWS)