Operasyon sa duha ka opisina sa Balamban temporaryong ihunong

CEBU, Philippines — Sugod karong adlawa hangtud sa Hulyo 17, 2020 temporaryong siradohan ug ihunong ang operasyon sa buhatan sa Municipal Civil Registry ug accounting office sa Lungsod sa Balamban kini human nga adunay empleyado nga nagpositibo sa covid-19 sa maong mga buhatan.

“Aron ipahigayon ang quarantine sa mga kawani nga posibleng primary ug secondary contacts sa nagpositibo sa covid-19”, tipik sa public advisory sa lungsod pinaagi sa Facebook page niini..

Ang disinfection sa tanang opisina sa municipal hall napahigayon na ug gisugdan na usab ang isolation protocol bisan og wala pa ang resulta sa swab test sa empleyado nga nataptan sa covid-19.

Gipatuman na usab ang “work from home” nga arrangement sa mga empleyado sa maong mga buhatan ug nihatag ang lungsod og numero sa telepono nga mao ang (032) 345-8220 alang sa mga adunay follow up transactions sa duha ka opisina.

Matag adlaw nga Biyernes sa buntag ra ang opisina sa municipal hall sa local Government Unit sa lungsod aron makapahigayon og disinfection sa building sugod sa ala 1:00 sa hapon.

“Padayon sa normal nga work schedule ang serbisyo sa traffic management, field personnel sa market operations ug emergency unit sa MDRRMO”, laing tipik sa maong advisory sa lungsod.  /BDB (BANATNEWS)