Pipila ka trabahante tangtangon sa lista sa exempted sa border

CEBU, Philippines — Nagkasabot si Gobernador Gwendolyn Garcia ug ang mga mayor nga tangtangon sa lista sa mga exempted sa border sa probinsiya ang pipila ka mga trabahante.

Kini tungod sa kalit mga pagsaka sa kaso sa coronavirus disease (covid-19) sa Dakbayan sa Sugbo.

Atol sa tigom kagahapon tali ni Garcia ug sa mga mayor inisyal nga nasabotan nga ang mga nagtrabaho sa grocery stores ug supermarkets ,pharmacy o drugstores, restaurant ug food chains ug katong mga nagtrabaho sa bakeries ang dili na maapil sa exempted sa border sa probinsiya pasulod ug gawas sa Dakbayan sa Sugbo.

Nagpasabot nga kinahanglang ang mga kompaniya mangita na gyud og kapuy-an sa mga trabahante niini nga taga probinsya apan nagtrabaho sa Dakbayan sa Sugbo.

Kini gumikan kay kong anaa na sila nakasulod sa Dakbayan sa Sugbo dili na sila kagawas pa aron makauli sa ilang mga panimalay sa mga lungsod ug dakbayan sa Probinsiya sa Sugbo.

Hinuon sa pagsulat niining balita wala pa mahuman ang nahisgutang tigom sa mga mayor ug wala pa na-finalize ang desisyon.

Inisyal usab nga nauyonan kagahapon nga kadtong mga masakpan nga makauli ngadto sa kalungsoran gikan sa Dakbayan sa Sugbo nga dili apil sa mga «exempted» nga adunay «essential functions» ang pabalikon sa Cebu City.

Pipila sa mga Mayor sama ni Daanbantayan Mayor Sun Shimuea ang nipadayag og kabalaka nga adunay pipila sa mga taga lungsod nga nagtrabaho sa Cebu city ang kalit lang nga niuli didto sa ilang lungsod bisan dili apil sa exempted.

Kini human sa kalit nga pagsaka sa kaso sa covid-19 sa Dakbayan sa Sugbo.

Sa border sa probinsiya diha sa Dakbayan sa Talisay inisyal usab nga nauyonan pinaagi sa rekomendasyon ni Talisay City Mayor Samsam Gullas nga diha na lang sa South Road Property  ang himuon nga entrance ug exit point sa tanang sakyanan nga mosulod ug gawas sa Dakbayan sa Talisay padulong Cebu City.

Pasabot nga katong boundaries diha sa Bulacao nga area ug uban pa ang siradoan na ug wala nay pasudlon nga sakyanan.  /BDB (BANATNEWS)