Gwen, mga mayor magtagbo ugma

CEBU, Philippines — Tungod sa pagsaka sa kaso sa coronavirus disease sa Dakbayan sa Sugbo, ang mga mayor sa tibuok Probinsiya sa Sugbo magtigom uban ni Gob. Gwendolyn Garcia ugmang adlawa.

Giawhag ni Garcia nga ang mga mayor nga mohimo na daan og inventory sa mga empleyado gikan sa ilang lungsod nga mag-ulian gikan sa Dakbayan sa Sugbo.

Apil na niini ang cargos nga mosulod gawas sa Dakbayan sa Sugbo padulong sa mga lungsod.

Gitanyag na sab sa Kapitolyo ang Busay Evacuation Center isip quarantine facility sa mga asymptomatic nga positibo sa COVID-19 sa Dakbayan sa Sugbo.

Nasayran nga sa 216 ka swabs nga gi-test kagahapon sa Vicente Sotto Memorial Medical Center Sub National Laboratory, 25 niini ang positibo sa Dakbayan sa Sugbo diin 22 niini ang bag-ong kaso ug tulo ang re-test. Matud ni Garcia nga sukad sa pagsugod sa testing sa Sugbo ang kagahapon ang nakapabalaka tungod kay mao kini ang labing daghan nga nagpositibo sa usa ka adlaw.

Subling niawhag si Garcia nga magpabilin sa panimalay kung walay importante mga lakaw. /GMR (BANATNEWS)