Amelioration forms gipugngan ni Samsam

CEBU, Philippines — Gipugngan una ni Talisay City Mayor Gerald Anthony “Samsam” Gullas Jr. ang pagpanghatag og form sa Social Amelioration Package sa nasudnong pangangamhanan.

Kini human siya mismo naglibog pa sa guidelines kun kinsa ang angayan nga hatagan sa P6,00 nga hinabang.

Matud ni Gullas nga kinahanglan siya makadungog gikan sa Department of Social Welfare and Development kay lain-lain ang nanggawas sa social ug mainstream media.

Gikalikayan sa mayor ang kalibog ug kasamok nga mahitabo sa pagpanglista sa angay nga hatagan. “They have to make clear guidelines and transparent sa public,” matud ni Gullas.

Samtang usa ka special session ang gihimo sa konseho sa Siyudad sa Sugbo aron pagtuki sa maong programa.

Matud ni Cebu City Mayor Edgardo Labella nga kinahanglan una siya tugutan sa konseho aron pag-submit sa mga rekisitos.

Asoy sa mayor nga iimplementar kini sa mga barangay uban sa Department of Social Welfare and Services diin sila na ang mohatag sa listahan aron pagpatuman sa SAP.

Giklaro sa mayor nga walay labot ang Mayor’s Information and Liaison Offices (MILO) ug ang barangay lang ang moatiman niini pinaagi sa pagpakig-alayon sa DSWS.

Hangyo ni Labella sa mga barangay nga dili sagulan og pamolitika ang programa ug mosunod gyud sa guidelines nga gipagawas sa DSWD.

Moabot sa 262,000 ka beneficiaries sa tibuok Dakbayan sa Sugbo ang makapahimulos sa maong programa. Decemay P. Padilla/GMR (BANATNEWS)