Sugbo gikonsagrar, Gwen emosyonal

CEBU, Philippines — Emosyonal si Gob. Gwendolyn Garcia sa pagbasa sa pag-ampo alang sa konsagrasyon sa tibuok Probinsiya sa Sugbo ngadto sa Mahal nga Birhen sa Guadalupe, ang patrona sa Sugbo.

Usa ka Santos nga Misa ang gipahigayon ni Cebu Archbishop Jose Palma subay sa bendita sa lukay kagahapon timaan sa pagbukas sa mga kalihukan sa Semana Santa.

Human sa misa gilitok ang pag-ampo alang sa Mahal nga Birhen kinsa naila nga milagroso ilabi na sa daghang kalamidad.

Matud ni Palma sa pag-ampo sa patrona sa Sugbo nga unta dili madugay ang epidemiya ug inubanan sa kooperasyon sa tanan.

Giawhag sa Arsobispo nga magpabilin lang ang katawhan sa ilang mga panimalay samtang gipatuman ang enhanced community quarantine ug mapasalamaton usab siya sa tanang frontliners kinsa padayon silang ilakip sa pag-ampo.

Human sa pag-ampo sa Arsobispo sa Oratio Imperata alang sa Covid-19, giampo pinangulohan sa gobernador ang konsegrasyon alang sa Mahal nga Birhen sa Guadalupe diin sa tunga-tunga wala kapugngi ni Garcia ang pagpangambak sa iyang mga luha ug ang kurog sa iyang tingug.

Ang gobernador wala nisalikway sa pag-angkon nga nitulo gyud ang iyang mga luha ug gani emosyonal kining namulong sa pag-ingon nga dili lalim karon ang giatubang sa katawhan, daghan nag-antus ilabi na ang mga kabus tungod sa ECQ ug daghan ang nawad-an sa ilang panginabuhian ug trabaho.

Dugang pa ni Garcia nga mas lisud kung ang kinabuhi ang mawala kay dili na mabalik hinungdan sa iyang panghinaut nga ang tanan makakuha og kusog gikan sa Mahal nga Birhen.

Malaumon si Garcia nga ang giatubang nga kalisud sa katawhan matabangan sa Diosnon nga Makagagahum ug igong kusog sa padayon nga pagpakabuhi. /GMR (BANATNEWS)