“One Vendor, One Stall” policy giuyonan sa mga vendors
CEBU, Philippines — Gisuportahan sa mga lider sa Carbon Market Vendors’ Association ang “One Vendor, One Stall” policy nga ipatuman sa umaabot nga mayor sa dakbayan sa Sugbo mayor Nestor Archival.
Sa press conference niadtong Hunyo 24 gipadayag ni Erwin Gok-ong sa Carbon Market Vendors Development Cooperative (CEMVEDCO) nga malipay sila sa maong lakang basta ipatuman kini sa tarong ug limpyo nga proseso, gawas sa under the table nga mga transaksyon.
"Since kami, kanunay nag-advocate sa balaod, di mi mosupak ana. Kung kinsa’y maligsan, so be it. Pero moagi lang og process nga ang mag-implement, dili mo dawat og under the table,” Matud ni Gok-ong.
Matud niya nga ang polisiya makahatag og patas nga oportunidad sa uban nga vendors nga gusto makapwesto sa merkado.
Gipasabot ni Gok-ong nga base sa Market Code, wala nay vendors karon nga nagkupot og daghang pwesto kay ang balaod nagtugot lamang og usa ka stall kada nuclear family.
Si Archival nangayo og lista sa tinuod nga vendors ug nangayo og transparency sa membership ug mipasalig nga iyang suportahan ang mga vendors pinaagi sa usa ka ordinansa lakip na ang pagpugong sa monopoliya sa stalls.
Gilauman ni Archival nga pinaagi sa suporta sa bag-ong konseho ug padayong negosasyon sa Megawide, mapatuman ang polisiya nga patas ug makabenepisyo ang tanang vendors sa Carbon Market. — Shiela Mae H. Agrabio (BANAT NEWS)
- Latest















