Tulisan nidaginot sa P100 nadakpan

CEBU, Philippines — Napakyas ang usa ka tulisan sa iyang planong mosibat human niya gitulis ang rider sa gi-book sa ride-hailing app kay nadakpan dayon kini sa kapulisan sa Toledo City Police Station sa Barangay Talavera, Toledo City kagahapon sa buntag, Martes, Hunyo 24, 2025.

Ang suspek mao si Rodaive Asintesta Belleza, 37, taga Barangay Langtad, dakbayan sa Naga.  Samtang ang biktima mao si Jamerito Abrasada Paired, 49, taga Sitio Kimba, Barangay Cansujong, Talisay City.

Nagkanayon si Police Lieutenant Colonel Wilfredo Alarcon Jr., hepe sa Toledo City Police Station ang suspek ni-book gikan sa Cebu South Bus Terminal.

Nagpahatud kini sa terminal sa tricycle sa Barangay Tabunok kay giingong adto mosakay paingon sa Barangay Manipis.

Apan pag-abot nila sa maong lugar niingon ang suspect nga magpahatod nalang kini sa Campo 1, Talisay City.  Pag-abot sa Campo 1 apan pagpadayon sa biyahe gitulis niya ang biktima pagabot sa Barangay Dumlog, Toledo City.  Sa Barangay Dumlog, Toledo City ninaog ang suspek apan P100 ray nakuha kay ikaduha pa siya nga pasahero ang suspek.

Gihulga matud pa sa suspek ang biktima nga dili mosumbong og polis apan nidangop gihapon kini sa mga beat patrol police sa Barangay Sangi, Toledo City nga dali dayong nigukod sa suspek ug nadakpan dayon kini.

Kasong robbery with intimidation ang ipasaka batok sa suspetsado. IBM BANAT NEWS