Mamili og pasahero sa talisay pamultahon
CEBU, Philippines – Pamultahon ang mga tricycle driver nga mamili og pasahero ingon man pagpangayo og daku nga plitehan sa mga pasahero sa Dakbayan sa Talisay.
Kini maoy gibutyag ni Jonathan Tumulak, traffic czar sa syudad, kinsa niingon nga ilang gisunod ang anaa sa ordinansa nga naaprobahan kaniadto pang tuig 2012.
Kini isip tubag sa mga reklamo sa mga Talisaynon nga gipadangat ngadto kang Mayor Gerald Anthony “Samsam” Gullas Jr. nga daw dili na molahos sa Barangay Cansojong o mga trip cutting.
Gipakigtagboan ni Tumulak ang mga lider sa mga organisasyon sa mga drayber aron hisgutan ang reklamo kung unsa ang ilang mahimo niini.
Samtang si Tumulak nagtinguha nga ilakip na nila ang numero sa mga traysikol nga mahimong padaganon.
Ang gitugotan nga makadagan nga traysikol nga nakakuha og franchise niabot lang sa 1,591 samtang ang padayon nga nagdagan karon niabot na sa kapin 3,000.
Iya sab nga giawhag ang mga sumasakay nga kun aduna silay reklamo sa mga drayber mahimo nila kining kuhaan og hulagway ingon man ang traysikol mismo aron dali nga mapitol. /GMR (BANAT NEWS)
- Latest
