Vendors wala ka uyon sa ilang balhinan

CEBU, Philippines — Kutob lang kagahapon ang three-day notice nga gipadala sa Prevention Restoration Order Beautification Enhancement (PROBE) ngadto sa mga manindahay og religious items diha sa dalan D. Jakosalem kilid sa Basilica Minore del Sto. Niño.

Si Raquel Arce, pangulo sa PROBE nagkanayon nga wala pa sila’y gihimong lakang tungod kay duna sila’y gihimong clearing operation nga prayoridad nila kagahapon diha sa Barangay Pasil.

Ang clearing operation subay kini sa hangyo sa Department of Public Works and Highways (DPWH) aron maimplementar na ang proyekto sa maong ahensiya diha sa nahisgutang lugar.

Sa nahisgutan nga demolisyon kapin sa 50 ka balay diha sa daplin sa sapa ang gipangguba.

Ang mga naapektohan niini gihatagan kini sa siyudad og tabang pinansiyal ug kabalhinan.

Nunot niini, si Enie Alvaran, Presidente sa Basilica United Vendors Photographers Association nagkanayon nga kon papahawaon gyud sila sa maong lugar mangayo sila og relocation site diin makapadayon sila sa pagpaninda.

Nasayran nga dunay gitanyag ang PROBE nga kabalhinan sa mga manindahay diha sa F. Gonzales Street apan si Alvaran nagkanayon nga dili sila pabor niini tungod kay dunay mga building sa maong dapit ug kong moreklamo kini posibleng papahawaon na usab sila.

Apan si Arce nagkanayon nga ilaha na kining gitan-aw ug aduna sila’y lakang nga himuon niini.

Samtang si Merlinda Batiller, usa sa mga manindahay og imahen nihangyo nga ipabilin sila diha sa D. Jakosalem Street ug andam sila nga mosibog sa pader sa Simbahan ug pagamyan ang ilang pwesto aron dili sila papahawaon.  (BANAT NEWS)