100 days nga nahimo ni Gwen ipasalida

CEBU, Philippines — Gikonsiderar ni Gobernador Gwendolyn Garcia nga usa sa dakong kalamposan nga iyang nahimo sulod sa iyang unang 100 ka adlaw sa Kapitolyo ang pag recover ug pagbalik sa posisyon sa probinsya ang mga luna niini.

Usa niini ang mga properties sa kapitolyo nga gituohan niyang irregular o wala moagi sa saktong proseso o di ba kaha naalkansi ang probinsya sa pagbaligya niini.

Apil na niini ang luna  nga giabangan sa Innoland Development Corporation nga nasayrang wala moagi sa provincial board ang pagparenta niini; ang lima ka dalan sa Salinas Drive ug gikan Governor M.J. Cuenco pasulod Cebu IT Park ug ang luna sa Bantayan Airport.

Ang pagpahunong sa pagtukod sa 20-storey resource center sa Kapitolyo nga gisugdan sa niaging administrasyon naapil usab sa listahan sa  gobernador nga kalamposan.

Gikonsiderar usab niyang kalamposan ang pagpasar sa pag-umento sa annual incentive sa mga front liners sa barangay sama sa tanod ug barangay health workers; pagkabanhaw sa Pasigarbo sa Sugbo; pagbalik sa Governor’s Cup ug pagsugod na sa bidding alang sa pagpaayo ug pang-kongkreto sa mga provincial ug barangay roads; pagtukod sa level three water system sa Carmen, Pinamungajan ug Moalboal ug ang pagbalik sa Suroy-Suroy Sugbo karong umaabot nga Nobiyembre.

Ang mga gipangangkong kalamposan ni Garcia  ipakita kini pinaagi sa usa ka video presentation atol sa iyang “Report of the Governor” karong Oktubre 12 sa Kapitolyo. (/IBM)(BANATNEWS)