Hagit nga nitay-og sa media Karon

CEBU, Philippines — Pormal nga gibuksan ang 27th Cebu Press Freedom Week kagahapon sa buntag diin subling ipadaplin sa nagkadaiyang media outfits sa Sugbo ang kompetisyon aron magtapuk-tapok samtang nagkaduol ang umaabot nga anibersaryo sa pagdeklarar sa Martial Law sa panahon sa diktadoryang Marcos.

Apan dili sama kaniadto nga adunay parada nga himuon, gisugdan kini pinaagi sa usa ka Santos nga Misa nga gipangulohan ni Fr. Roberto M. Ebisa, SVD, ang General Manager sa DyRF 1215 ug Power 89.1 nga gihimo diha sa Cebu Provincial Capitol Social Hall.

Sama sa naandan, diha ang tanang nagunang pamantalaan sa Sugbo nga mao ang The Freeman ug Banat News; Sunstar; ug ang giusab nga CDN Digital ug ang mga radio stations ubos sa Kapisanan ng mga Brodkaster ng Pilipinas.

Atol sa wali ni Ebisa gibasa ug gihubad niya ang tulo ka mga parables sa Ebanghelyo  nga mao ang the Parable of the Lost Sheep, the Parable of the Lost Coin and the Parable of the Lost Son.

Gipakasusama niya ang kinabuhi sa tawo ilabi na sa mga sakop sa media nga makabuot sa pagpili o may kagawasan sa pagpili kun asa nga dalan ang iyang subayon.

Dugang pa ni Ebisa, bisan sa daghan mga hagit sa mga sakop sa media karon dili kini angay magpakawala sa paglaum.

Sumala pa ni Ebisa, daghan sa mga journalist ang nibiya tungod sa mga kalisod ug mga kabalaka apan aduna usab daghan ang nidesider nga mobarug ug magpabilin nga magpakaisog.

 “For just like Stripes and Yellow we believe there is more waiting for us in the midst of the digital revolution; that there will be joy in the end so much like the three parables in the Gospel of today,” tipik sa iyang wali.

Ang industriya sa media nagatubang og hagit sud na sa pipila ka tuig gumikan sa pagkusog sa social media nga sayon rang ma-access pinaagi sa modernong teknolohiya sama sa internet.

Tungod usab sa social media naapektahan hasta ang gidaghanon sa mga magpamantala ug nakaingon sa pagus-os sa negosyo daghang mga media outlets.

Tungod sa kabalaka sa uban, daghang lokal nga mediamen ang nibiya sa industriya ug duna say daghang gitaktak sa trabaho.

Apan si Ebisa nagkanayon nga dili pa kataposan sa industriya tungod kay daghang paagi aron makalahutay.

“We in the press are far, greater than the challenges haunting us. It is okay to be afraid but we don’t let fear cripple us.  We are not like the monkeys of Africa as we have the courage to let go. We will adapt, we will transform- we re-invent ourselves- and there will be rebirth…we are butterflies! Yes, we can fly,” panapos pa ni Ebisa.

Bisan wala nay paradang gihimo naa gihapon ang gipaabot nga pa- raffles ug ang gikahinaman sa tanan nga mao ang presentasyon sa mga mananayaw sa nagkadaiyang media outlets.

Migawas nga mananaog ang CDN Digital sa 1st Place, 2nd Place ang The Freeman ug 3rd Place ang Sunstar Cebu. Daghan ang niuli nga malipayon human nakabitbit og daug sa raffles adunay usab ang nagmagul-anon kay wala swertiha apan nagmalipayon gihapon kay nagkakitaay pagusab sa ilang mga kauban sa buhat nga panagsa nalang nila igkita sa personal tungod sa trabaho.

Karong semanaha adunay daghang mga kalihokang giandam alang sa pagsaulog sa 27th Press Freedom Week. (/IBM)(BANATNEWS)