Pag-wan sa Metro Cebu dala sa bagyong Liwayway

CEBU, Philippines — Pagbunok sa uwan nga nasinati sa Metro Cebu nga niresulta sa pagbaha sa pipila ka mga lugar giingong epekto sa bagyong Liwayway matud pa sa officer-in-charge sa Pagasa Visayas nga si Engr. Al Quiblat.

Sa pagkutlo ning maong balita kagahapon base sa alas 11 sa buntag nga weather advisory, ang bagyo naa sa 510 kilometros sidlakang bahin sa Maasin, Leyte.  Matud pa nga nagdala kini og mga pagpanugdog ug kilat nga maoy nakaapekto sa dagan sa panahon.

“Sa atong forecast sa pagkakaron, mogawas na siya sa PAR mga Thursday pa. So, samtang naa pa na sa PAR kung dili man gani ang iyahang trough, ang Habagat maoy moepekto sa nasud pero dili man siya expected mo landfall in any part of the country sa karon nga data,” asoy ni Quiblat.

Ang bagyo nag-irog padung sa amihanang-kasadpan ug kung dili kini mosimang masinati pa gihapon ang mga pagulan sa nasud hangtud sa adlaw nga Martes.

“So Miyerkules improving atong weather condition pero mag-expect ta naa gud tay scenario nga mahimo siyang tropical storm kusog-kusog pa iyang hangin so mag-expect ta nga windy niya atong bantayan ana ang kadagatan na sad sa mga sunod nga mga oras. So, sige ta og monitor kung maka-issue ba ta og gale warning sa Visayas,” dugang ni Quilbat. Kagahapon gikan sa alas 8 sa buntag hantod sa alas 4 sa hapon niabot sa 15 millimeters ang natala nga total rainfall. Ug kini niresulta sa palapaw sa mga creeks sa Cebu City ug miawas sa kadalanan ilabi na sa Manalili.

Giawhag ni Quiblat ang publiko nga magsige og monitor, motan-aw sa social media account sa Pagasa aron mahibawo sa mga advisory ug warning nga i-isyu sa ahensiya.

Samtang ang pangulo sa Cebu City Disaster Risk Reduction and Management Office Harold Alcontin miasoy pipila sa mga lugar sa siyudad nga gibahaan.

Kini mao ang dalan sa North Reclamation Area (Mabolo), dalan Colon, T. Padilla, Bonifacio area,Manalili, ug ubang bahin sa north area. Asoy sab ni Alcontin nga misaka sab ang tubig sa pipila ka mga kasapaan. Tungod niini gimandoan ang Cebu City Fire Volunteers nga mopahigayon og roving sa ilang area of responsibility aron tabangan ang mga maapektahan sa baha.

“Kasagaran basta mga north area mao gyud na siyay mobaha dayon pero dali ra pud siya mo subside. Ubos ra dayon ang tubig. So until now nagsige tag standby monitoring sa atong opisina ang atong Quick Response Team, ang atong Cebu City Fire Volunteer ug atoang Emergency Medical Service we are on the alert karon regarding aning weather condition,” matud ni Alcontin.

Gumikan kay nagsigi man og uwan giawhag ni Alcontin ang mga barangay officials nga bantayan ang ilang area of responsibility.

Giawhag sab niya ang katawhan ilabi na kadtong mga nagpuyo daplin sa sapa nga kung makita misaka na ang tubig mohiklin gyud dayon sa mas luwas nga dapit. (/IBM)(BANATNEWS)