‘Butane’ niulbo, 3 nag-refill naangol
CEBU, Philippines — Tulo ka lalaki ang naangol human niulbo ang mga butane nga gituohang illegal nilang gi-refill sud sa usa ka panimalay sa Barangay Dumlog, Dakbayan sa Talisay Lunes sa tungang gabii.
Ang mga naangol ug nakaangkon og second degree burns mao sila Jimbo Gutang, 22; Mark Parba, 19; ug Jeven Daño, 21. Sila si Fire Senior Insp. Arra Alapajaro sa Talisay City Fire dali nga niresponde sa lugar human sila nakadawat og tawag nga adunay sunog nga nahitabo sa maong lugar.
Apan sa ilang pag-abot, wala na ang kayo ug wala nasab ang mga nasamdan. Nakita sa kabumberohan mao nalang ang nagpasad nga mga butane canisters ug usa ka 50 kg nga tangke sa Liquefied Petroleum Gas (LPG) nga naa sa sulod sa pinuy-anan sa ginganlan lang og Clifford.
Nagduda sila si Alpajaro nga ang naangol maoy illegal nga nag-refill og LPG ngadto sa butane canisters. Ang mga butane canisters gidesinyo nga kausa rang gamiton apan ang mga basiyo niini gisudlan hinuon og LPG.
Matud sa kabomberohan, ang ingon niini nga lata daling moulbo ug hinungdan sa mga nahitabong sunog dinhi sa Sugbo tungod sa kanipis niini.
Ang kabumberohan nakigtambayayong na sa kapulisan kinsa maoy nisakmit sa mga butane canisters ug LPG sa maong panimalay. (IBM) (BANAT NEWS)
- Latest
