“Fixer” gipusil patay
CEBU, Philippines – Patay ang gipasanginlang fixer nga nagpwesto gawas sa Cebu City Hall human kini gipusil diha sa may C. Padilla Street, Barangay Duljo-Fatima ning dakbayan samtang nagsakay kini sa iyang motor padulong na unta sa trabahoan kagahapon sa buntag.
Ang nakalas mao si Hutch Abadia, minyo, residente sa may 5th Street, Upper Galili C. Padilla, Barangay Duljo Fatima.
Giangkon ni Police Staff Sergeant Ryan Panugaling, investigator sa Mambaling Police Station blangko pa sila kun unsay motibo sa pagpusil patay sa biktima.
Gitug-an ni Panugaling, mosusi usab sila sa mga closed-circuit television cameras sa lugar basin og makatabang kini sa pag-ila sa mga mamumuno sa biktima.
Gidala sa tambalanan si Abadia kay nagginhawa pa kini bisan og adunay usa ka samad nga gituohang pinusilan diha sa iyang ulo apan gideklarar kining patay pag-abot sa pribado nga tambalanan.
Usa sa mga residente sa maong lugar nitug-an buto nalang iyang nadunggan ug sa iyang paglingi nahagba na ang biktima apan wala siya makakita sa mamumuno.
Ang uyoan ni Abadia nga si Roy nitug-an wala siyay nasayran nga adunay kakontra ang iyang pag-umangkon kay maayo man usab kini nga tawo.
Pipila sa mga nakaila sa biktima nagtuo nga basin naalaan nga asset si Abadia. Sa pagkakaron padayon ang imbestigasyon sa kapulisan sa maong hitabo. (/IBM)(BANAT NEWS)
- Latest
