Pre-trial sa kaso ni Silawan gisibog

CEBU, Philippines — Gisibog ngadto sa Hulyo 10 ang pagpahigayon sa pre-trial sa kasong murder sa akusado sa pagpatay kang Christine Lee Silawan nga si Renato Llenes.

Nunot sa maong pag-uswag, hangyo sa prosekusyon ngadto kang Regional Trial Court (RTC) Branch 70 Judge Christine Muga-Abad sa Dakbayan sa Lapu-Lapu nga ang pagsibog ngadto sa maong petsa kay wa pa sila matapos sa pagbutang og marka sa ilang mga ebidensya.

Gipasabot ni Fiscal Ruso Zaragosa nga  ilang gihangyo nga maangan-angan ang pre-trial nga pagahimuon tungod sa kadaghan sa ilang mga ebidensya nga maoy nakaingon nga nadugay usab ang ilang pag-marking niini.

Gitinguha sa prosekusyon nga ang paghan-ay daan sa tanan nilang  mga ebidensya aron masiguro nga  lig-on ang  kaso nga ilang ipasaka batok  ni Llenes kinsa ilang giisip nga usa ka  high profile ug ingon man  capital offense. Nunot niini ang abogado ni Llenes nga si Atty. Manuel Degollacion Jr.  mipadayag nga nagplano sila sa iyang kliyente nga mohangyo sa korte nga usahon ang mga kasong murder, illegal possession of firearms ug Comelec gun ban nga mahitabo ang hearing sa RTC Branch 60 karong Hulyo. (BANAT NEWS)