Minilyong balor sa guso, lagutmon apektado sa huwaw

CEBU, Philippines — Niabot na sa P78 milyones ang danyos sa huwaw gikan sa dili momenus 37 ka mga lungsod ug dakbayan sa Lalawigan sa Sugbo.

Basi ang maong tala sa validated assessment report sa Provincial Disaster Risk Reduction and Management Office (PDRRMO) gikan sa gisumiter nga report sa mga LGUs.

Sa datos sa PDRRMO, ang Lungsod sa Bantayan maoy nakatala og labing daku nga danyos tungod sa 300 ka ektarya nga guso nga naapektuhan sa gitawag og “ice-ice”. Nasayran moabot ngadto sa P24 milyones ang danyos niini. Nakasinati sab ug susamang suliran ang Lungsod sa Santa Fe diin 50 ka ektaryang guso ang apektado diin mokabat sa P4 milyones ang danyos.

Sunod sa labing daku og danyos mao ang Lungsod sa Compostela nga dili momenus P14 milyones tungod sa naapektuhang high valued crops.  Ang Lungsod sa Tabuelan nakatala usab og P8.8 milyones tungod sa kadaut sa lagutmon ug uban pang klase sa pananom.

Apektado usab ang Daanbantayan human ang ilang nagkadaiyang pananom nangadaut diin miabot ang danyos niini og P6.3 milyones.

Dili momenus sa 5, 776 na sab ka mag-uuma ug 924 ka mananagat ang namroblema tungod sa epekto sa grabeng kainit ngadto sa ilang mga pananom.

Ang ubang LGUs nakatala usab og minilyon nga danyos sa agrikultura, panagat, hayopan ug uban pa dala sa El Niño. (/DILT)(BANATNEWS)