Lider sa drug group, mga sakop nadakpan Camille Pateres

CEBU, Philippines — Gikatahapang lider sa usa ka drug group sa Dakbayan sa Sugbo sikop kauban ang iyang duha ka mga kakunsabo ug nasakmitan og P1.2 balor sa illegal nga drugas didto sa Barangay Bulacao kagahapon sa kaadlawon.

Giila sa kapolisan ang gikatahapang nagtukod og iyahang drug group nga si Archie Rosales Abellana alyas Archie Bayot, 39 , residente sa Barangay Suba, Dakbayan sa Sugbo.

Gitawag sa kapolisan ang iyang grupo nga Abellana drug group. Lakip nga nadakpan ang mga gituohang mga tawo niini nga gilla sab sa kapolisan nga silang: Marjory Pastorpili Arriesgado, 33,  taga Sitio Cabotoy sa  Barangay Pooc, Dakbayan sa Talisay; ug si Lendon Perez Gonzaga ,37, usa ka fish vendor, ug residente sa Sunrise Village, Barangay Poblacion Pardo, Dakbayan sa Sugbo.

Sa report sa polis, positibong napalitan sa poseur buyer si Abellana og usa ka pakete sa gituohang shabu ug sa dihang gihiling ang sling bag niini, nakaplagan ang lain pang tulo ka mga pakete nga may sulod nga gidudahang shabu.

Samtang silang Arriesgado ug Gonzaga nakuhaan og tagsa ka pakete sa susamang shabu. Kun usahon og timbang, adunay gibugaton ang maong mga drogas nga 168.14 ka gramo nga mokantidad og P1,143,352 base Dangerous Drug Board Value.

Nadakpan na kaniadto si Abellana sa kasong pagpamaligya ug paghupot og illegal nga shabu tungod sa pagpamaligya og shabu ug siya maoy gitumbok sa intelligence report nga middleman sa supplier sa illegal nga drugas gikan sa Bilibid.

Ang hepe sa Pardo Police Station nga si Police Major Regino Maramag Jr. nga sa miaging buwan pa nakagawas sa prisohan sa Abellana ug nibalik dayon sa iyang pagpamaligya og ilegal nga drugas.

Sa laing operasyon, nadakpan ang 38-anyos ngasi  Alejandro Omilgo, alyas Boyet, taga Nivel Hills, Barangay Lahug.

Si Omilgo nadakpan atol sa buy bust operation nga gipahigayon sa mga tinugyanan sa Mabolo Police Station sa usa ka inn sa may Barangay Capitol Site Sabado sa hapon.

Nasakmit gikan sa dinakpan ang mga pinutos sa ginadili nga drugas nga mobalor ug dul-an sa P127 mil. Samtang siyam ka tawo ang nadakpan sa mga sakop sa Presinto  1 sa  Mandaue City  Police Office (MCPO) tungod sa pagdala og gidudahang shabu atol sa ilang paglabay sa checkpoint sa dalan  A. Soriano Avenue. (Rowena Capistrano ug RomeoT.Limpangog/IBM)(BANATNEWS)