Parkingan sa Tabunok Public Market magamit na

CEBU, Philippines — Posibleng magamit na karong semanaha ang parkingan nga anaa mahimutang sa tapad sa merkado sa Barangay Tabunok, Dakbayan sa Talisay kay hingpit na nga nahuman ang maong edipisyo. Niadtong milabay nga mga adlaw, pipila ka mga tawo ang mipadangat sa ilang pangutana kon nganong wala pa gigamit ang maong parkingan.

Si City Engineer Audie Bacasmas mipasabot nga nalakip ang parkingan sa Phase 2 sa Tabunok Public Market project. Apan kay aduna pamay gipang-ayo sa ubang bahin sa Phase 2, dili pa gyud maturn-over sa kontraktor ang proyekto ngadto sa kagamhanan sa siyudad. Apan karon lang bag-o, nakadawat og impormasyon si Bacasmas nga nahuman na gyud ang Phase 2 busa wala nay rason nga dili mapuslan ang maong parkingan.

Laing reklamo sa mga tawo nga nakabisita sa lugar mao ang pagkasubidahon sa rampa sa parkingan nga makapasangit sa bumper sa sakyanan.

Si Bacasmas miingon nga sila mismo, misuway niini sa pagpasaka sa sakyanan ug wala silay nakitang problema sukwahi sa maong mga reklamo.

Ang iya lang nakita nga kon apeke man gani ang kaalam sa pagmaneho sa sakyanan, dili nalang gyud pugson aron malikay sa disgrasya.

Ang gigamit karon nga parkingan sa mga traysikol mao ang luna nga gipanag-iya sa pribadong indibidwal nga gipahuwam lang una sa kagamhanan.

Ug nasayran nga ang ilang kontrata sa paghuwam nahibaw-an nga mapupos nasab karong buwana. (/DILT)(BANATNEWS)