Ika-500 ka tuig nga kasumaran sa Kristiyanismo

CEBU, Philippines — Gilusad kagahapon ang Pagsangyaw 2021 isip pagpangandam sa umaabot nga ika-500 ka tuig nga selebrasyon sa pag-abot sa Kristyanismo sa Pilipinas.

Ang maong kalihukan gipangulohan sa Archdiocese of Cebu pinaagi ni Cebu Archbishop Jose Palma uban ang Commission on the Laity nga gipangulohan sab ni Fe Barino ug mga representante sa mga parokya ug lay organizations.

Usa ka hamubo nga programa ang gipahigayon sa wala pa gisaulog ang santos nga misa alang sa pagpadala sa mga magsasangyaw ngadto sa ilang tagsa-tagsa ka mga parokya.

Ang Pagsangyaw 2021 nga adunay tema nga “Gifted to Give” diin kabahin niini ang formation program sa Catholic Bishops Conference of the Philippines diin bisan sa kadaghan sa ilang kalihukan giapil gyud ang programa nga gibasi sa mga gitudlo sa ka-obispohan.

Niining tuiga, ang tema sa Pagsangyaw mao ang “Kristohanong Pagtuo, Tawag, Gasa ug Misyon” diin pagahisgutan sa sunod nga mga adlaw ang pagbukas sa pagpanaw sa pag-ila sa kaayo sa Dios. Ang Pagsangyaw 2021 adunay nagkadaiyang module nga pagatukion ug pagaambitan sa mga parokya ug nagkadaiyang organisasyon nga sugdan sunod Domingo, Marso 24.

Si Palma mahinangpon ug malipayon sa paglusad sa maong kalihukan kay una kining kalihukan sa tibuok artsidyosesi ug dayosesi sa nasud sa pagpangandam sa 500 years of Christianity.

Malaumon siya nga sa umaabot nga tuig 2021 daghan nang mga pamilya ug katawhan nga ma-evangelize ug hugot na ang ilang pagtuo sa Kristyanismo.

Giklaro sa arsobispo nga ang pagsangyaw dili lamang sa mga layko apan apil na ang tanan hinungdan nga kinahanglan gyud kining suportahan ug ipakaylap.

Samtang si Barino malaumon nga sa umaabot 2021, puy-an na sa katawhan ang tukma nga pagpakabuhi ug dili nalang kutob sa istorya sa ilang pagtuo apan apilan na usab og buhat.Siya malaumon nga ang Pagsangyaw 2021 haum karong panahona ilabi na nga daghang katawhan ug pamilya karon ang gihagit sa mga pagsuway. (/DILT)(BANATNEWS)