Pari mi-molestiya’g sakristan

CEBU, Philippines — Usa ka minor de edad nga sakristang babaye sa simbahan ang nireklamo nga gimolestiya sa usa ka pari nga nadestino sa usa sa mga parokya sa Lungsod sa Dumanjug niadtong adlaw nga Domingo sa kaadlawon.

Si Police Officer 3 Irish Buena, pangulo sa Women’s and Children Desk sa Dumanjug Police Station nagkanayon nga Biyernes na na-report sa ilang buhatan ang reklamo sa bata human nga nangayo ang mga ginikanan niini og Police Report aron isuporta sa reklamong giduso ngadto sa National Bureau of Investigation.

Wala ibutyag ni Buena ang mga pangalan sa gireklamong pari ug sa biktima. Sumala pa ni Buena, nakadungog siya sa maong taho apan wala nila kini nakompirmar tungod kay walay nidangop sa ilang buhatan.

Dugang pa ni Buena, base sa iyang inisyal nga imbestigasyon naandan na sa mga altar server o sacristan nga babaye nga anha matulog sa rectory.

Alas-12 sa kaadlawon niadtong adlaw nga Domingo, niabot ang maong pari ug matud pa gipahinumdoman kini bahin sa iyang vitamins apan giingnan ang biktima nga ihatud nalang sa iyang kwarto.

Sumala pang Buena sa dihang nahatod na sa bata ang maong vitamins sa kwarto gipakaon kini sa pari ug pagkahuman gipatupad og higda. Didto nahitabo ang mga malaw-ay nga gibuhat sa pari ngadto sa biktima bisan sa pagsupak niini. Dugang pa ni Buena na- trauma gyud ang bata. Matud niya mahimong makasohan ang maong pari og Acts of Lasciviousness in relation to RA 7610.

Samtang si Archbishop Jose Palma sa Archdiocese of Cebu, nimando na sa protocol committee paghimo og imbestigasyon batok sa maong pari ug pagduol sa pamilya sa bata. Gihulipan na ang maong pari. (/IBM)(BANATNEWS)