Langyaw gilugos, drayber nasikop

CEBU, Philippines — Nagtingkagol karon sa prisohan ang 41 anyos nga tricycle driver human gipasanginlang mipugos pagpaum-om sa iyang kinatawo ngadto sa langyaw nga turistang Columbian didto sa lungsod sa Moalboal niadtong Pebrero 27 sa kaadlawon.

Niadtong Byernes gidakop sa mga kapolisan ang suspek nga giila nga si Linton Tapales, residente sa Barangay Basdiot sa maong lungsod human siya positibo nga gitumbok sa 31 anyos nga biktima.

Sigun pa ni Police Corporal Wilfredo Rosal, desk officer sa Moalboal Police Station nahitabo ang krimen niadtong Pebrero 27 sa kaadlawon sa dihang nag-inusarang misakay ang biktima sa traysikol ni Tapales aron magpahatod sa resort sa Barangay Tubli diin temporaryo  kining nagsaka.

Gikan ang biktima sa laing resort sa Barangay Basdiot diin atoa ang daghang kalingawan sa mga turista matag     gabii.

Sumala pang Rosal, imbes nga ihatud diretso sa resort giingong giliko sa suspek ang traysikol sa usa ka hilit nga lugar ug didto pugsanon niining gipaum-om ang iyang kinatawo sa biktima.

"Wala na siyay mabuhat kay gi-threaten siya nga dili na siya ihatod sa Kasai kung di niya to buhaton," sigun sa maong polis.

Wala hinuon gihilabtan ang pagkababaye sa biktima. Kay pagkahuman sa suspek gihatud niya ang biktima sa resort.

Apan pag-abot didto, diretsong nangayo og tabang ang biktima sa mga kawani ug nisumbong sila sa mga polis.

Niadtong Biyernes, malampusong nadakpan sa follow-up operation si Tapales ug gitanggong na sa Moalboal Police Station.

Ugmang adlawa, Lunes, pormal nga pasakaan og kaso  og rape ang maong dinakpan. (/IBM)(BANATNEWS)