Mga pagi ug tiil sa manok nasakmit

CEBU, Philippines — Nikabat ngadto sa 50 ka kilo nga pagi ug 13 ka kilo nga tiil sa manok ang nasakmit sa mga sakop sa Department of Veterinary Medicine and Fisheries (DVMF) gikan sa Pasil ug Carbon niadtong Miyerkules.

Matud ni Dr. Alice Utlang, pangulo sa DVMF nga ang fishery division nga gipangulohan ni Merlyn Catipay nikonpiskar sa mga pagi human kini gibiyaan sa traysikad driver nga nagkarga niini diha sa Pasil.

Ang maong mga pagi nagkantidad kini og P6,000 ug giingong naggikan sa Lungsod sa Bantayan.

Ang pagpamaligya og pagi ug uban pang endangered marine life kalapasan kini sa Akta Republika 8550 kun “Philippine Fisheries Code”.

Samtang 13.4 kilos ka tiil sa manok nga dili haom kan-on tungod kay adunay bunga-bunga sa tiil ang nasakmit usab ug ang tag-iya giisyuhan og citation ticket tungod kay kalapasan kini sa Akta Republika 10536 kun “The Meat Inspection Code of the Philippines”. BDB (BANAT NEWS)