Pagkahanaw sa footages sa dash cam ni Castro ipaimbestigar

CEBU, Philippines — Ang direktor sa Police Regional Office (PRO)-7 Chief  Superintendent Debold Sinas nimando sa direktor sa Cebu City Police Office (CCPO) Senior Superintendent Royina Garma sa pag-imbestigar kabahin sa giingong pagkahanaw sa footages sa dashboard camera (dash cam) sa sakyanan ni Fiscal Mary Ann Castro.

Si Castro kinsa nagmaneho sa iyang Nissan Juke nga sakyanan gibanhigan patay kini niadtong Enero 17, 2019 diha sa  dalan sa Escario, Barangay Kamputhaw, Dakbayan sa Sugbo sa mga wala mailhing kriminal nga nagsakay og motorsiklo.

Niadtong Sabado ang kamaguwangang anak ni Castro nga si Annamhel Monique Castro Roa nibisita diha sa DYHP ug nipadayag nga nakurat siya nga napapas ang footages sa dash cam sa iyang inahan sa biyahe niini niadtong Enero 17.

Gipadayag ni Annamhel nga matag biyahe sa iyang inahan “on” gyud ang dash cam niini sa sakyanan ug recorded ang mga biyahe niini.

Matud ni Annamhel nga modangop sila sa National Bureau of Investigation (NBI)-7 aron magpatabang sa imbestigasyon kalabutan sa nahitabo sa iyang inahan.

Si Sinas nipadayag nga naglisud sila sa imbestigasyon sa maong krimen tungod kay walay nibarog nga mga witness ug ang footages sa CCTV walay nakuha nga hulagway sa mga kriminal. Nichole Alexis A. Abas (BANAT NEWS)