Inahan nga niabuso sa iyang anak ni-plead guilty

CEBU, Philippines — Usa ka 56-anyos nga ginang kinsa ni-plead guilty ang mabilanggo sulod sa 16 ka tuig sa kasong attempted trafficking ug attempted child trafficking.

Ang maong inahan napasakaan sa nahisgutang kaso tungod sa giingong pagpahigayon niini og online child sexual exploitation o child pornography niadtong tuig 2017 kinsa ang iyang 15-anyos nga anak nga babaye maoy iyang biktima.

Niadtong Lunes sa hapon si Regional Trial Court (RTC) Judge Ramon Daomilas, Jr. sa Branch 11 ang nipagawas sa maong hukom human nga ni-plead guilty o pag-angkon sa nahisgutang ginang sa maong krimen.

Si Daomilas nimando usab nga ang nahisgutang ginang pabayaron kini og P1.1 milyon alang sa combined fines ug damages.

Ang nahisgutang inahan unang gipasakaan og kaso nga qualified trafficking in persons nga adunay silot nga tibuok kinabuhi nga pagkabilanggo ug pagbayad og danyos nga P2 milyones ngadto sa P5 milyones. Gipakunhoran ang maong silot sa korte dihang ang kaso nga gipasaka batok sa maong inahan ang gipaubsan kini ngadto sa attempted trafficking ug attempted to commit child trafficking.

Ang nahisgutang ginang nadakpan sa Barangay Opao, Dakbayan sa Mandaue niadtong Mayo 27, 2017 human kini naaktohan nga nitanyag sa iyang menor de edad nga anak ngadto sa langyaw pinaagi sa online.

Ang maong operasyon kaniadto gipangulohan sa Regional Anti-Cybercrime Office-7 sa Philippine National Police human sa referral gikan sa Queensland Police Service sa Australian Federal Police.

Gihangop ni Bise Mayor Carlo Fortuna ang conviction nga giluwatan ni Daomilas tungod kay nakabaton og hustisya ang maong menor.

Ang field office director sa International Justice Mission-Cebu nihangop sa hustisya nga nakab-ot sa maong menor tungod kay pinaagi sa plea bargaining agreement dili na kini kinahanglang mo-testify batok sa iyang inahan.

Ang maong menor de edad mapasalamaton nga gitubag ang iyang pag-ampo ug nanghinaot kini nga mahunong na ang tanan nga mga pagpangabuso.

Ang maong menor ubos karon sa kostudiya sa Department of Social Welfare and Development. (BANAT NEWS)