Excavation sa siyudad ipa-monitor

CEBU, Philippines – Nunot sa landslide sa Sitio Sindulan, Tinaan, Siyudad sa Naga, si Konsehal Jerry Guardo niawhag sa Cebu City Environment and Natural Resources (CCENRO), Office of the Building Officials (OBO) ug Mining Regulatory Board sa  Dakbayan sa Sugbo nga susihon ang excavation application sa nagkalain-laing kompaniya.

Si Guardo nga chairman sa Committee on Environment, Energy, Transportation, Communication and other utilities ug Committee on Infrastructure nagkanayon nga importante gyud nga masusi kini aron malikayan ang mga dili maayong insidente.

Sigun sa konsehal nga duna la’y usa ka approved quarrying application sa Barangay Pulangbato dungan sa pagbutyag nga ang siyudad wala’y large scale quarry operation.

Nidugang si Guardo nga iyang irekomendar kang Mayor Tomas Osmeña nga mohatag og financial aid sa mga apektadong residente sa Siyudad sa Naga diin ang pundo adto kuhaon sa disaster funds.

Sa iyang bahin, ang vice chairperson sa MRB, Konsehal Alvin Arcilla, niingon nga nagsige sila og monitor sa mga bisan unsa nga quarry-related activities sa bukirang barangay.

Ilang gisusi ang aplikasyon ilabi na ang location sa site aron masiguro nga dili kini maghatag og peligro sa publiko.

Gawas niini, ang MRB uban sa Mines and Geosciences Bureau (MGB) mopahigayon sab og site inspection.

Samtang si CCENRO Executive Assistant Lito Vasquez niingon nga bisan wala’y presensiya sa large scale quarry site sa siyudad hugot gihapon silang nag-monitor sa hauling activities sa excess construction materials.

Base sa record, matag buwan makadawat sila og dili momenus napulo ka hauling application sa dili pa kini aprubahan mohimo una sila og site inspection.

Dugang ni Vasquez nga aron masiguro nila nga ang developer nituman sa polisiya sa siyudad, usa ka special team ang i-deploy sa mountain barangay alang sa monitoring. (/GMR)(BANAT NEWS)