Nagpatrolya nga RMFB nakasikop og 8 pusher

CEBU, Philippines — Nagbunga ang pagsuroy-suroy sa mga sakop sa Regional Mobile Force Battalion (RMFB) sa mga sitio sa Barangay Tangke, Dakbayan sa Talisay niadtong Domingo.

Kini human nakadakop sila og walo ka tawo nga nalambigit sa ginadiling oras.

Matud ni SPO1 Erwin Carbonquillo sa Talisay City Police Station nga nagpahigayon og foot patrol ang mga sakop sa RMFB sa lugar nga naila nga daghang baligya nga ilegal nga drugas hinungdan sa pagkasikop nila ni Ricky Agan, 35, taga South Poblacion, Siyudad sa Naga; Armando Jamen, 28, taga Sta. Catalina, Negros Oriental; Jade Cañadilla, 20, taga Sitio Bantayan, Tungkop, Lungsod sa Minglanilla; Orly Resurreccion, 21, taga Upper Bayong, Inayagan, Dakbayan sa Naga; Desiderio Gonato, 30, taga sitio Lulukhan, Sua, Lungsod sa Argao; Jason Gallardo, 18; Virnard Felicilda, 31, taga Sitio Ilang-Ilang, Lagtang ug Rodelio Daño, 38, taga Barangay San Roque, Dakbayan sa Talisay.

Samtang nasikop sab ang duha ka pusher og shabu sa buy-bust operation sa Poblacion, Lungsod sa Liloan alas 11 pasado sa niaging gabii.

Si Chief Inspector Jose Angelo Acupinpin, hepe sa Liloan Police Station, niila sa nadakpan nga sila si Tito Cañete ug Manuelito Dagatan nga pulos hingkod nga nagpuyo sa maong dapit ug giila nga street level target.

Nasakmit gikan sa mga dinakpan ang shabu nga balor og P11,800. (BANAT NEWS)