Mga kapitan sa Santa Fe nihural kang Kongresman Salimbangon

CEBU, Philippines — Mayoriya sa mga kapitan sa Lungsod sa Santa Fe kaalyado na ni Kongresista Benhur Salimbangon sa ikaupat nga distrito sa Lalawigan sa Sugbo.

Kini nasuta atol sa pagpanumpa sa mga kapitan sa maong lungsod diin sa napulo ka barangay, pito ang nihural kang Salimbangon.

Sila ang mga kapitan sa Barangay Talisay, Pooc, Kinatarcan, Hagdan, Maricaban, Balidbid ug Ocoy.

Dungan sab nga nanumpa ang mga konsehal.

Ang pagpahural gitambungan sab ni Bise Mayor Ithamar Espinosa kinsa kaalyado ni Salimbangon.

Atol sa okasyon, gipaambit ni Salimbangon ang mga nakahan-ay nga mga proyekto sa Santa Fe diin dakong porsiyento nakatutok sa padayong paghimo sa mga circumferential roads.

Dugang ni Salimbangon nga katapusan na niyang termino isip kongresista sa maong distrito apan matud niya nga dili matapos ang iyang pagserbisyo sanglit padayon siyang moabag sa mosunod kaniya.

Samtang walo sab ka chairman sa Sangguniang Kabataan ang pormal nga nanumpa sa ilang katungdanan kauban sa ilang mga kagawad.

Kini gilangkuban sa SK Federation president nga si Jessie Ladeth “Jay L” Contento sa Pooc, vice president Clea Marie “Klee-Klee” Lao sa Talisay, Donavel Oftana sa Kinatarcan, Jara Maxin Desabille sa Hagdan, Rey John Derder sa Balidbid, Jessica Flores sa Ocoy, Kent Warren Abello sa Maricaban ug SK chairperson sa Hilantagaan. (BANAT NEWS)