DVMF way mahimo sa ‘endangered species’

CEBU, Philippines — Walay mahimo ang mga sakop sa Department of Veterinary Medicine and Fisheries sa Cebu City Hall kabahin sa pagpamaligya og mga “endangered species’ sa aseras sa dalan Magallanes.

Ang Cebu City Council niawhag unta sa DVMF nga gipangulohan ni Dr. Alice Utlang nga himoan og aksiyon ang pagpamaligya og kahayopan nga panagsa na lang makit-an sama sa mga langgam Kalaw, Sal-ing, Banog, Antolihaw ug uban pa.

Nakadawat og report ang mga konsehal sa dakbayan nga ang ubang tigbaligya sa mga endangered species dili mo-display sa ilang baligya kay nasayud sila nga kun kini makit-an sa mga tinugyanan sa balaud, sakmiton kini.

Sa iyang suwat ngadto sa City Council, si Dr. Utlang nipasabot nga wala siya’y mahimo kabahin sa gipamaligya nga mga endangered species kay wala sila gi-deputized sa Department of Environment and Natural Resources.

Matud ni Utlang nga ang bugtong nila nga mahimo kon makakita sila niini mao ra gyud ang pagpahibalo dayon sa mga tinugyanan sa DENR aron nga sila na ang mohimo og      aksiyon.

Ang pagbuhi og mga hayop, apil ang mga langgam nga panagsa na lang makita, gitugot sa balaud apan kinahanglan nga mokuha una og permiso gikan sa DENR Wildlife Section.

Kaniadto diha sa dalan Kamagong, Lahug daghang mamaligya og lainlaing langgam nga makita lang sa mga dagkong lasang sa Mindanao ug ubang bahin sa nasud apan gironda sa mga sakop sa DENR.  (BANAT NEWS)