Chapter presidents sa FETCUDA dapig kang Emit

CEBU, Philippines - Wala pa gihapon nadesisyonan sa konseho sa Dakbayan sa Talisay kun mahukasan ba sa iyang komitiba sa urban poor si Konsehal Doroteo Emit subay sa panawagan sa Federation of Talisay City Urban Dwellers Association (FETCUDA) kay wala na silay salig sa konsehal.

Ang FETCUDA niduso sa ilang petisyon batok kang Emit ngadto sa konseho niadto pang niaging buwan. Si Konsehal Gail Restauro nga maoy gitahasan sa pagresolbar sa maong kasungian niingon nga dili dali ang pagpagawas og desisyon kay atol nga nanglarga sila sa kauluhan ug aduna sa’y laing grupo sa urban poor nga nipadala og suwat kaniya nga nipadayag og suporta ngadto ni Emit.

Matud ni Restauro nga dili mahimo nga laktoron ang proseso busa iya unang paminawon ang tanang habig. Iyang gipasabot nga ang grupo nga niduol kaniya mao kadtong mga presidente sa nagkadaiyang chapter sa FETCUDA nga moabot sa 40 ka buok. Dugang niini  nga gihuwat sab niya ang habig ni Konsehal Emit, kun nganong kinahanglang magpabilin siya sa maong komitiba. Human unya niya makuha ang tanang habig, mopatawag siya og tigum aron silang tanan tapukon.

Sa pagkakaron, ang FETCUDA nga nipadala niya sa unang suwat, dili na kaayo interesado sa ilang hangyo kay dili na man kini motunga kun kini ipatawag.

Nasayran nga sa pagdawat ni Restauro sa maong hangyo, iya unang gisusi kun mga namirma sa petisyon, tinuod ba gyud nga sakop sa FETCUDA.

Kahinumduman nga naglagot ang taga FETCUDA human ang ilang gisaligan nga representante sa Presidential Commission of the Urban Poor (PCUP) nga si Ma. Llura Layun, gipapahawa sa konseho. Apan ang FETCUDA nitumbok kang Emit nga maoy utok sa tanan nilang lakang hinungdan nga nawagtang ang ilang pagsalig niini.

Si Emit una nang nipasabot nga ang iyang lihok aduna’y pagtugot sa iyang mga kaubanan sa konseho. (BANAT NEWS)