Loot nagtuong nataligam-an sa Ombudsman ilang dokumento

CEBU, Philippines - Ang kanhi mayor sa Daanbantayan Ma. Luisa Loot ug ang incumbent nga konsehal nga si Samuel Moralde gikatakdang mosumitir og mga dokumento ngadto sa Ombudsman karong Lunes may labot sa kasong malversation of public funds.

Si Loot nagtuo nga nataligam-an sa Ombudsman ang maong mga dokumento tungod kay nabasura naman unta ang maong kaso.

Silang duha gikasohan og malversation of public funds ug kalapasan sa Section 3(e) sa Akta Republika 3019 kon “Anti-Graft and Corrupt Practices Act nga gikatakdang ipasaka sa Ombudsman ngadto sa Sandiganbayan.

Si Loot nga nahinabi sa Banat News kagahapon nagkanayon nga sa milabay’ng lima ka buwan nabasura na ang kasong administratiba batok kanila.Gibutyag hinuon ni Loot nga gihatagan pa sila og lima ka adlaw aron pagsumitir og supporting documents aron dili masang-at ngadto sa SB ang maong kaso.

Lakip sa naglangkub sa mga supporting document mao ang resolusyon sa konseho, approval sa Department of Agriculture ug endorsement sa treasurer. Kini nga kaso niadto pang tuig 2007 dihang si Moralde dili pa konsehal sa lungsod apan siya maoy chairman sa RBA Quail Raisers Association nga maoy gigahinan og P500 mil nga pundo sa lungsod alang sa agri-business expansion niini pinaagi sa memorandum of agreement (MOA) nga wala mabayari ug wa sab makatuman sa MOA. Si Moralde sa iyang bahin, nagkanayon nga ang proyekto naapektohan sa bagyong Frank niadtong Hunyo, 2008 ug ang RBA napugos sa pagpa-condone sa loan.

Nangangkon usab kini nga ang mga dokumento sa RBA nadaot sa bagyong Yolanda niadtong Nobiyembre, 2013.

Giingong wala’y nakita nga record ang Ombudsman  sa “request for condonation” o aksiyon sa SB sa maong request. - /EIM) (BANAT NEWS)