Kabalhinan sa taga Mananga giandam pa
CEBU, Philippines - Gibarugan ni Talisay City Mayor Eduardo Gullas nga wala gyuy mahitabong pagpangguba sa mga panimay sa Sitio Mananga 1 sa Barangay Tabunok kun dili pa mahimong mabalhinan ang yuta nga ilang giandam alang sa mga maapektuhan nga residente.
Matud ni Mayor Gullas nga iyang paningkamutan nga madali nila ang pagpahiluna sa yuta nga balhinan sa mga maapektahang mga residente.
Kini nagkanayon nga ang mga residente dili angay mabalaka kay giandam na nila ang tunga ka ektaryang luna sa Barangay Pooc. Ilakip unya sa pagpabalhin ang 38 ka pamilya sa Barangay Lagtang nga mga informal settler.
Dugang ni Gullas nga iya unang gipaabunuhan ang mga luna kay lupa kini apan siguro gyud nga masulod ang taga Mananga ingon man ang taga Lagtang.
Si Rosalie Autor, pangulo sa Local Housing Office niingon nga ginagmay na lang nga mga trabaho ang ilang gihimo sa yuta. Sa nasayran, ang DPWH nihatag og tagal sa mga residente sa pagguba sa ilang mga gipuy-an karong Pebrero 15 aron ang ilang proyekto nga pagpalig-on sa pundasyon sa Mananga Bridge dili mabalda. Si Autor nitataw nga posibleng makabalhin ang mga residente sa katapusang semana sa Pebrero o ba kaha sa unang semana sa Marso.
Apan sa pagkakaron, ang mga naapektahang residente, makadawat og tag P3 mil nga financial assistance gikan sa siyudad. (BANAT NEWS)
- Latest
