Opisyal sa Tanke, drug protector?

CEBU, Philippines - Giangkon sa kapulisan sa Dakbayan sa Talisay lisud gyud puhagon ang ginadiling drugas sa Brgy. Tanke tungod sa impormasyon nga ilang nadawat nga adunay opisyal sa barangay nga protektor sa ilegal nga kalihukan.

Si Supt. Emerson Dante, hepe sa kapulisan sa dakbayan niingon nga padayon ang ilang pagsusi sa impormasyon nga ilang nadawat.

Siya nagkanayon nga pirme lang molutaw ang pangan sa maong opisyal apan nagdumili lang una kini sa pagbutyag sa pangalan.

Matud pa ni Dante nga dili lang sa barangay Tanke nga opisyal ang ilang gisusi karon kundi hasta ang ubang mga barangay.

Asoy pa niya nga pirme ang maong opisyal sa paghangyo kaniya matag aduna sila’y madakpan apan pirme niya kining balibaran.

Sigun pa niya nga dili niya ikaguol kun masuko o masilo niya ang mga mohangyo tungod kay dili man siya taga Talisay ug igo lang siya nga nituman sa iyang trabaho.

Iyang giklaro nga nakasabot ra sab siya sa mga nihangyo kaniya tungod kay mga politiko man kini nga nagkinahanglan og botos sa iyang mga konstituwente.

Ning bag-uhay lang daghan ang nangreklamo sa mga molupyo sa Tanke human sa pagpangronda sa mga sakop sa Philippine Drug Enforcement Agency (PDEA) tungod sa giingon nga giapil nila pagdakop ang mga nagduwa og basketball bisan og wala kini labot nga namaligya og ginadiling drugas. Si Kapitan Perla Cabanes nihulagway nga wala gyud sila nagkuwang sa ilang paningkamot nga mawagtang ang ilegal nga negosyo sa ilang lugar.

Asoy pa ni Dante nga nagkasabot na sila ni Kapitan Cabanes nga butangan og pulis sa ilang lugar aron dali ra gyud mahibaw-an ang mga tawo nga mosulod-gawas aron mogamit og ilegal nga drugas lakip na unya ang mga namaligya. (BANAT NEWS)