Kahuot sa prisohan dili rason nga dili na manakop ang kapolisan
CEBU, Philippines - Giawhag ni Cebu Provincial Police Office (CPPO) director Eric Noble ang mga nagkadaiyang police station sa kalungsuran ug dakbayan nga pormal nga mosuwat ngadto sa iyang buhatan kabahin sa problema sa kahuot sa ilang prisohan. Kini aron iyang mapadangat ngadto sa mga concerned agencies o local government units ang maong suliran.
Giangkon ni Noble nga nahimong problema sa kapolisan ang pagdaghan sa ilang nadakpan hinungdan nga dili na maigo sa mga prisohan hilabi na nga wala na modawat og priso ang Cebu Provincial Detention and Rehabilitation Center kay huot na sab kini.
Matud niini nga buot niyang ipadangat ang maong suliran kang Gobernador Hilario Davide III.
Alang niya nga usa sa pamaagi aron ma-decongest ang provincial jail mao ang pagpadala na sa mga priso nga gikatakdang ibalhin na ngadto sa New Bilibid prison.
Bisan pa man sa maong problema matud ni Noble nga dili kini angay mahimong rason nga dili manakop ang kapolisan kay maka-uuwaw sa publiko kun nagdawat ang mga polis og P20 mil nga sweldo matag buwan apan nahimong kalamposan.
Dugang niya nga wala niya gimando nga kinahanglan makadakop og 5 ka suspek ang kapolisan sa probinsiya matag adlaw sama sa gihimo sa Cebu City Police Office apan pahimangno niya sa iyang mga sakop nga kinahanglan adunay report nga mahatag kaniya. (BANAT NEWS)
- Latest
