Curfew ordinance nakahipos og kabataan

CEBU, Philippines - Walo ka menor de edad ang gihipos sa mga sakop sa Local Social Welfare and Development Office (LSWDO) ug kapulisan sa Compostela Police Station niadtong Huwebes sa gabii tungod sa gipatuman nga curfew.

Si Police Officer 2 Daryl Rondina sa Compostela Police Station nagkanayon nga kabahin kini sa implementasyon sa curfew ordinance sa lungsod nga nagdili sa mga nag-edad og 18-anyos paubos diha sa kadalanan sugod alas-10 sa gabii hangtud sa alas-5 sa buntag.

Ang mga menor de edad nga nahipos nagpuyo sa upat ka barangay ug pulos naabtan diha sud sa mga internet cafés kay nagduwa og online games. Ang mga bata gidala sa LSWDO ug gipatawag ang ilang mga ginikanan.

Ang ordinansa sa lungsod adunay silot nga upat ka oras nga community service; ikaduha, unom ka oras nga community service ug ikatulo, walo ka oras nga community service.

Kadtong dili moserbisyo sa community service pabayron og P100 sa first offense, P300 sa ikaduha ug P500 sa ikatulo nga offense. Kun dili makabayad, ang ilang ginikanan o guardians ang silotan nga mag- community service para sa ilang anak.

Apan kun ikaupat pataas na maka- violate ilang anak, ang ginikanan pabayron og P500 ug dad-on ang ilang anak sa Department of Social Welfare and Development aron didto maymayan. (BANAT NEWS)