PB nisuporta paghatag og emergency powers ni PDU30

CEBU, Philippines - Nipadayag og suporta ang Hunta Probinsiyal sa Lalawigan sa Sugbo nga hatagan og emergency powers si Presidente Rodrigo Duterte aron masolusyonan ang problema sa trapiko sa nasud.

Giaprubahan sa provincial board (PB) ang resolusyon nga gisang-at ni Bokal Edsel Galeos sa segundo distrito nga nagpadayag og “strong support” sa paghatag og emergency powers ngadto kang Duterte aron maoy mosulbad sa krisis sa transportasyon sa nasud ilabi na sa Metro Cebu.

Matud ni Galeos nga ilang gisuportaran ang hangyo sa Department of Information and Communications Technology (DICT) nga nihangyo sab sa senado nga tagaan og gahum si Duterte nga aron makalihok ang maong ahensiya gamit ang information and communications technology (ICT)-Based solutions alang sa problema sa trapiko.

Nasayran nga si DICT Undersectary Eliseo Rio Jr. nitanyag og pipila ka mga information and technology solutions nga makatabang sa pagpahupay sa trapiko sama sa “telecommuting” ug “teleclasses” kun diin ang mga empleyado ug estudyante dili na kinahanglan pa nga mosulod sa trabaho ug ang mga estudyante dili na mosulod sa klase kay ubos sa maong paagi, sutaon sa mga employers ug eskwelahan kun unsa nga mga kalihukan sa ilang mga empleyado ug estudyante nga mahimo ra sa ilang balay ug dili na kinahanglan pang mosakay.

Ang uban mao ang online government services, ICT-based traffic situational awareness waze ug parking management ug high-speed wifi.

Matud ni Rio, ang nasud nagkinahanglan og 67 mil ka cell sites aron mapalambo ang internet access. Sa kasamtangan, aduna lay 20 mil ka cell sites ang Pilipinas.

Dugang ni Galeos nga ang pagpalambo sa internet service, dili lang makapalambo sa trapiko sa Metro Manila apan lakip na sa Sugbo.

Ubos sa emergency powers, ang presidente ug tanang pangulo sa mga department ug ahensiya ubos sa executive branch nga apil sa transportation ug traffic management makahimo na sa paggamit sa tanang gikinahanglan gikan sa gobiyerno, paggamit sa police power ug katakos nga mahimong epektibo ang pag-implementar sa tanang proyekto subay sa kasulbaran sa problema sa trapiko. gikan sa report sa The Freeman (BANAT NEWS)