Duha patay sa drugas

CEBU, Philippines - Patay ang usa ka gikatahapang  pusher og shabu  sa Brgy. Catarman, Lungsod sa Cordova human gikatahong namusil ngadto sa polis nga nisuway pagsikop kaniya.

Si Senior Police Officer 1 Laurencio Wagwag sa Cordova Police Station miila sa suspetsado nga napusilan nga mao si Rustie Tejano, alyas Payat, nagpuyo sa maong dapit.

Matud pa ni Wagwag nga nalakip na ang maong namatay sa Oplan Tukhang sa kapolisan apan wala kini motahan sa iyang kaugalingon ug giingong nagpadayon kini sa iyang ilegal nga operasyon.

Dugang pa ni Wagwag nga ang mga lumolupyo ug ang mga barangay opisyal sa maong lugar maoy mipadangat og reklamo kalabot sa ilegal nga kalihokan sa maong suspetsado sa ilang lugar.

Ang hepe sa lungsod nga si Senior Inspector Jomar Medel maoy nangulo sa buy-bust  operation apan nakamatikod nga polis ang iyang gikaatubang nga kustomer ug daling miibot sa giluklok niyang armas sa hawak apan ang back  up sa poseur buyer nga nagtion na daan nakauna pagpusil kaniya.

Dali nga gidala si Tejano ngadto sa Lapu-Lapu District Hospital sa Dakbayan sa Lapu-Lapu apan ang doktor nga nag-atiman kaniya mideklarar  nga patay na kining naabot sa tambalanan.

Nakuha diha sa crime scene ang usa ka kalibre .38 nga armas, unom ka gagmay nga pakete nga gituohang shabu, buy-bust money nga P250.

Patay usab ang usa ka lalaki nga una nang mitahan sa kapulisan sa lungsod sa Tuburan sa Oplan Tokhang human kini gipusil samtang sakay sa iyang sakyanan diha sa Barangay 7, Tuburan sa nakalabay nga hapon.

Ang biktima mao si Erwin Negro Supatan, nga taga Barangay 8 sa maong lungsod.

Matud pa ni Police Officer 2 Jameller Palanas sa Tuburan Police nga nahinabi sa Banat News mitahan na kaniadto sa Oplan Tukhang sa ilang buhatan ang biktima human nga naapil kini sa lista sa mga drug personalities sa lungsod.

Sakay sa iyang sakyanan ang biktima kauban ang usa ka Marvin Camingawan nianang tungora dihang kalit lang miabot ang usa ka motorsiklo nga dunay sakay nga duha ka lalaki nga nag-bonnet ug ang back rider mipusil sa biktima. Si Camingawan daling misutoy og dagan samtang mipabulhot sab palayo ang gunman. Si Palanas miingon nga usa sa ilang gisubay karon mao ang motibo sa panagbikil o panag-away sa grupo ni Palanas nga nalambigit sa drugas, apan wala sab nila gisalikway ang uban pang mga motibo sa himuon nilang imbestigasyon. (BANAT NEWS)