Rampada apektado sa pag-ayo sa taytayan

CEBU, Philippines - Makapausab sa kalihukan sa Kadaugan sa Mactan ang padayong pag-ayo sa Mactan-Mandaue Bridge.

Matud ni Lapu-Lapu City Mayor Paz Radaza nga usa niini ang rota alang sa street party ug Rampada.

Kini gumikan kay dili na masirad-an ang dalan Manuel L. Quezon diin ipahigayon ang kalihukan.

Ang pagsaulog sa Kadaugan sa Mactan magsugod sa Abril 15 hangtud Abril 27 samtang ang pag-ayo sa una’ng taytayan molungtad pa sa Agosto 29.

Samtang gitinguha karon sa buhatan sa trapiko sa Dakbayan sa Mandaue nga kapugngan ang mga sakyanan nga makasulod sa sentro sa siyudad.

Si Architect Florentino Nimor, pangulo sa Traffic Management Board, nipahibawo nga ila gihugtan ang No Left Turn Policy gikan sa Dakbayan sa Lapu-Lapu nga nagsubay sa U.N. Avenue ug palahuson na ngadto sa Highway M.C. Briones.

Matud ni Nimor nga ang pagpaliko sa mga sakyanan paingon sa kinapusuran sa siyudad ang nakita nga hinungdan sa paghuot sa mga sakyanan.

Kadto lang gikan sa Mactan-Mandaue Bridge ang makaliko sa wala padulong sa sentro sa dakbayan.  (BANAT NEWS)