10 Mayors nangayo’g Police escorts

CEBU, Philippines - Kapin sa 10 ka mayor sa Probinsya sa Sugbo ang nihangyo sa Cebu Provincial Police Office nga mahatagan og police escort ilabi na kay nagpaingon na ang piniliay.

Kini human nagpagawas og memorandum order ang direktor sa CPPO, tulo ka semana na ang nilabay, nga nag-recall sa police escorts sa mga politiko.

Apan ang direktor sa CPPO, Senior Supt. Clifford Gairanod, nibutyag nga kinahanglan pa nga mopadangat og suwat hangyo ang mga mayor sa Commission on Elections aron aprobahan sa Police Regional Office-7 headquarters.

Hinuon, gawas sa mayor wala’y labot sa recall order ang gobernador ug mga kongresista. Ang recall order pinasubay usab sa kamanduan sa Kampo Crame.

Kung may hangyo, subayon pa usab kung angayan ba nga hatagan ug lakip sa susihon kung may hulga ba sa kinabuhi ang mao’ng indibidwal.

Samtang bisan sa gipatuman nga Comelec gun ban, giangkon ni Gairanod nga daghan gihapon ang nahitabo’ng krimen nga naglambigit sa mga pagpamusil sa probinsiya.

Plano ni Gairanod nga pahugtan pa nila ang checkpoint sa nagkadaiyang dapit ug ang matag police station mohatag og programa kung asa ug unsa’ng orasa sila mohimo og checkpoint.

Mismo si Gairanod ang mosubay sa mga dapit kauban ug ang iya’ng mga deputy chief ug bahin-bahinon nila ang mga dapit.

Sa mga masakpan nga nagtinapulan ug wala motuman sa mandato, kini mag-atubang sa tukma’ng silot.  (BANAT NEWS)