Magtiayon gi-ambush patay

CEBU, Philippines - Patay ang magtiayon nga negosyante human silang duha gitusaktusak sa bala dihang gi-ambush sa mga gidudahang tulisan diha sa Purok Dabong, Sitio Landing, Brgy. Catarman lungsod sa Liloan pasado alas 7 sa nakalabay ng Dead on the spot sila si Josephine Angelo samtang patay na nga naabot sa tambalanan ang iyang bana nga si Celedonio Angelo, human girapido ang mga biktima nga sakay sa ilahang multicab.

Unang migawas nga pagduda nga tulis ang motibo sa krimen tungod kay giingong gikuha sa mga gikatahapan ang bag sa mga biktima nga gituohang adunay dakong kantidad.

Apan ang hepe sa Liloan Police nga si Sr. Insp. Ramil Morpos nga nahinabi sa Banat News nagduda ug nagtuo nga posibleng patay gyud ang tuyo sa mga mamumuno ug panglipat lang sa imbestigasyon ang anggulo sa tulis.

Kini human nakakuha og impormasyon si Morpos nga adunay nakabikil ang magtiayon bahin sa problema sa yuta.

Si Morpos miingon nga ngitngit, mingaw ug kurbadahon ang lugar diin gihimo ang pagpatay apan adunay nakabantay daan sa mga mamumuno nga giatangan daan ang magtiayon.

Pag-abot sa lugar gibabagan sa usa ka itom nga XRM nga motorsiklong giluwanan sa duha ka lalaking pulos nagsuot og helmet ang multicab ug ang back rider mikanaog dayon mipusil sa duha sa makadaghan nga higayon.

Human sa pagpamusil gikuha sa gunman ang shoulder bag ni Josephine dayon sibat sa lugar, samtang daling gidala si Celedonio sa Liloan Medical Health Clinic apan patay na kini pag-abot didto.

Nagduda si Morpos nga mga gun-for-hires ang mga mihimo sa krimen.

“Kung tulis, di pud siguro kadaghan nimo pusilon ang tawo, pero kadaghan man gyud gipusil, gipatay man gyud. Basin kadtong pagkuha sa bag secondary na lang to aron malipat ang polis unya tulis ang mahimong motibo. Patay man gyud ang tuyo ani, di man tulis,” pasabot pa ni Morpos. Pito ka basiyo sa kalibre .45 nga pistola ang narekober sa kapulisan sa crime scene. Aduna nay mga pangalan nga nakuha ang kapulisan nga ilang gisubay sa posibleng kalambigitan sa maong krimen.

Ang magtiayon adunay tulo ka mga gagmay pa nga mga anak.  (BANAT NEWS)