Zika virus gi-monitor

CEBU, Philippines - Gawas sa ubang virus, usa sa gikabalak-an karon ang Zika virus nga makuha usab gikan sa lamok nga nagdala og dengue.

Hinuon ang hepe sa Regional Epidemiology Surveillance Unit-7, Renan Cimafranca, nagkanayon nga wala’y kaso sa Zika virus sa nasud.

Apan dili usab angayang mokompiyansa aron makalikay sa sakit.

Matud ni Cimafranca nga kinahanglan nga manglimpiyo usab sa palibot ug puhagon ang mga itlogan sa lamok.

Gibutyag ni Cimafranca nga ang simtoma sa tawo nga mataptan og Zika virus sama sa mataptan og dengue nga makasinati usab og hilanat, joint pain, rashes ug conjunctivitis o pamula sa mata.

Ang tawo nga mataptan kung dili dayon matambalan molanat lang kini gikan sa duha ngadto sa pito ka adlaw.

Matud ni Cimafranca nga sama sa dengue wala’y pili ang mataptan sa mao’ng virus apan ang labi’ng delikado kung ang usa ka nagsabak mao’y mataptan tungod kay moresulta kini sa congenital anomaly sa bata nga gisabak inig ka tawo niini o dili normal.

Dugang ni Cimafranca nga padayon ang ilang pagpahigayon og monitoring sa Zika virus.

Ang Department of Health nipahimangno sa mga nagsabak nga dili mobiyahe sa mga lugar nga apektado sa Zika virus.

Lakip sa mga lugar nga naapektuhan mao ang pipila ka lugar sa South America ug Brazil.

Wala pa’y na-report nga kaso sa Zika virus sa nasud apan niadto’ng 2012 usa ka 15-anyos nga lalaki nga taga Dakbayan sa Sugbo ang gikataho’ng nataptan sa mao’ng virus hinuon naluwas ra.

Ang mga airlines usab giingong mokanselar sa mga flights sa mga nagsabak nga babaye kinsa mobiyahe paingon sa mga nasud nga apektado sa Zika virus.  (BANAT NEWS)