Rama nalipay nga ang Annual Budget giaprobahan na

CEBU, Philippines – Bisan og gipagamyan sa Cebu City Council ang kantidad sa giduso nga 2016 Annual Budget sa dakbayan, apan gikahinangop na lang kini sa suspendido’ng mayor nga si Michael Rama.

Matud ni Rama nga nalipay na lang siya nga giaprobahan na sa City Council ang P6.4 bilyones nga budget alang sa lainlaing gastohanan sa dakbayan sunod  tuig.

Si Konsehal Margarita “Margot” Osmeña, pangulo sa Committee on Budget and Finance sa konseho, miingon nga wala nila aprobahi ang kinatibuk-an nga P8.9 bilyones nga budget nga gisugyot ni Rama kay ang ubang kantidad adto man kuhaon sa halin sa South Road Properties.

Nagpabilin ang baruganan sa kadaghanang konsehal nga dili pa angay’ng gastohon ang nadawat nga pasiunang bayad sa pagbaligya og 45 hektareyas nga yuta sa SRP kay dili pa “final” ang hukom sa korte sa kaso nga gipasaka ni Atty. Romulo Torres.

Si Rama hinuon dili pa maoy makapirma sa giaprobahan nga Annual Budget tungod kay ang iyang preventive suspension molungtad pa og duha ka buwan.

Nalipay usab si Rama nga bisan og wala aprobahi ang P238 milyones nga budget nga iyang gisugyot alang sa paghipos sa mga basura, apan miabot gihapon sa P135 milyones ang budget nga giaprobahan alang sa mao nga gastohan.

Karong tuiga, P51 milyones ra ang budget nga giaprobahan para sa gastohan paghipos sa mga basura, apan gidugangan hinuon og laing P50 milyones nga gahin.

Matud ni Konsehal Osmeña nga ilang nabana-bana nga ang P135 milyones paigo na nga gastohon sa paghakot sa mga basura ug sa bayad sa paglabay sa mga sagbot ngadto sa pribadong landfill sa lungsod sa Consolacion.

Gipasabot ni Osmeña nga bisan og dako na ang budget nga gitagana sa paghipos sa mga basura, apan dili gihapon kini kasiguroan nga limpyo ang atong siyudad kun ang mga kawani nga hingtungdan magtinapolan sa ilang trabaho.  (BANAT NEWS)