P30 mil bonus sa taga Talisay City Hall
CEBU, Philippines - Uyon ang konseho sa Dakbayan sa Talisay sa dili mominus tag P30 mil nga Christmas bonus sa mga kawani sa City Hall. Gikatakda nga karong adlawa ipasar sa konseho ang supplemental budget nga giduso ni Mayor Johnny V. delos Reyes.
Sa P23 milyones nga supplemental budget, P4.5 milyones niini alang sa intelligence fund ug P3.6 milyones nga ipalit og mga sakyanan ingon man ang P60 mil nga water work projects.
Si Bise Mayor Romeo Villarante nibutyag nga nauyunan sa mga konsehal nga ihatag ang bonus sa mga kawani ug mga job order employees.
Iya’ng gipasabot nga kadto’ng mga kawani nga nagsweldo og P30 mil paubos matag buwan ang makadawat og tag P30 mil samtang kadto’ng mga kawani nga nagsweldo og P30 mil pataas ang makadawat og bonus nga bali’g usa ka buwan.
Ang mga job order sab nga nagtrabaho sugod niadtong buwan sa Hulyo hangtud ning buwana, makadawat ug tag 50 matag adlaw kwentahun kini hangtud ning buwan sa Disyembre.
Apan ang intelligence fund nga gipangayo sa mayor nga kantidad og P4.5 milyones ang wala uyuni ug wala sila’y gitagana nga kantidad bisan usa ka daku. Ila’ng gipasabot nga dili na magamit ang intelligence fund tungod kay hapit na mahuman ang tuig ug gawas pa dili na usab kini ma-liquidate.
Gilaslasan sab sa konseho ang budget alang sa pagpalit og sakyanan ingon man ang water work projects. (Gabriel C. Bonjoc/GMR)(BANAT NEWS)
- Latest
