CSC di mosuspenso ni Cuevas
CEBU, Philippines - Gibasura sa Civil Service Commission ang gipangayo nga suspension ni kanhi kongresista ug mayor Tomas Osmeña batok ni Cebu City Treasurer Diwa Cuevas.
Matud sa resolusyon sa CSC nga gipirmahan ni CSC Director IV Karin Litz Zerna nga pre-mature ang gi-file ni Osmeña.
Wala pa usab mahuman ang imbestigasyon sa CSC sa reklamo ni Osmeña batok ni Cuevas.
Base sa Revised Rule on Administrative Cases sa Civil Service nga mahimo lang maka-isyu og suspension order kun mahuman na sa CSC ang imbestigasyon.
Si Cuevas mapasalamaton tungod sa pagbasura sa reklamo ni Osmeña batok kaniya.
Dugang ni Cuevas nga wala siya nagpabaya sa iya’ng responsiblidad isip City Treasurer ug natubag na usab sa Commission on Audit ang isyu.
Hinuon masaligon si Cuevas nga ibasura gyud sa CSC ang gipangsang-at nga reklamo ni Osmeña tungod kay nagpangutana usab siya sa nagkalain-lain nga auditing firms kabahin sa reklamo.
Samtang si Osmeña sa iya’ng bahin nagkanayon nga dawaton na lang ang desisyon nga gipahamtang sa CSC sa iya’ng reklamo batok ni Cuevas.
Sa niagi’ng tuig si Osmeña nipasaka og 36 ka reklamo batok kang Cuevas ug City Auditor, Atty. Mark Salomon, ngadto sa Department of Finance ug CSC.
Adunay 26 nga reklamo nga gipasaka ni Osmeña ngadto sa DOF ug 12 sa CSC batok sa duha. (Sheriza Mae R. Uy/GMR)(BANAT NEWS)
- Latest
