SB1 sa siyudad wa gihapon aprubahi sa konseho

CEBU, Philippines - Gisuwayan na usab pagtuki sa mga kaalyadong konsehal ni Mayor Michael Rama ang pagtuki sa Supplemental Budget No. 1 diha sa konseho kagahapon apan wa gihapon kini mosalir.

Si Konsehal Noel Wenceslao sa iyang privilege speech miingon nga ang pagbasura sa korte sa gisang-at nga kaso ni Atty. Romulo Torres batok sa konseho bahin niini pagmatuod lang nga way angay ikabalaka ang siyudad pagpasar niini.

Matud pa niya nagpamatuod lang nga legal gamiton sa siyudad ang halin sa South Road Properties nga maoy kuhaan sa pundo alang sa SB-1.

Dugang pa ni Wenceslao nga dako kaayo ang matabang sa panginahanglan sa siyudad ang halin sa SRP. Ang halin planong ibayad sa kinatibuk-ang utang sa dakbayan nga P2.4 Bilyones ngadto sa Japan International Cooperation Agency (JICA) nga maoy nipautang og kwarta alang sa pagtukod sa SRP. Gipasabot ni Wenceslao nga matag tuig nagsakripisyo ang siyudad sa utang tungod sa pagusab-usab sa kantidad sa Yen ug Peso ug ang pagsaka sa interes niini matag tuig.

Gawas sa pagbayad sa utang sa SRP, diha gihapon sa SB1 kuhaon ang Productivity Enhancement Incentive (PEI) sa mga kawani sa City Hall, Tipping Fees sa basura ug uban pa.

Si Wenceslao mihangyo sa konseho kagahapon nga tukion kini pagbalik apan gibabagan kini ni Konsehal Sisinio Andales sa rason nga wala pay “final judgement” ang hukmanan bisan gibasura na ang kaso.

Si Torres niduso og motion for reconsideration tungod sa pagbasura sa korte sa iyang kaso. (BANAT NEWS)