Polis ‘napusilan’ patay sud sa kampo
CEBU, Philippines – Patay nang nakaplagan sa iyang mga kaubanan ang usa ka polis nga adunay samad pinusilan diha sa iyang ulo sud sa pansayan sa ilang kampo sa 4th Regional Public Safety Maneuver Company-7 sa Barangay Catagbacan Norte lungsod sa Loon, Bohol kagahapon sa kaadlawon.
Gidala pa unta sa hospital apan gideklarar nga patay na si Police Officer 1 Larry Belches, 32, taga Babatngon, Leyte.
Base sa imbestigasyon nga gihimo sa Loon Police Station ang duty guard sa kampo nga sila si PO1 Andie Mabanta ug PO1 Junatin Ater nakadungog og buto sa armas.
Gisubay ni Mabanta kun asa dapita gikan ang maong buto ug sa pag-abot niya sa pansayan nakit-an niya nga nagkadugo na si Belches duol sa inodoro ug wa na maglihok.
Daling nangayo tabang sa ilang kaubanan si Mabanta ug gidala dayon kini sa Gov. Celestino Gallares Memorial Hospital apan gideklarar kini sa mga doctor nga patay na.
Narekober sa mga imbestigador ang isyu ni PO1 Belches nga Glock pistol ug usa ka kabhang sa bala niini.
Aduna pay gihimong imbestigasyon ang kapolisan pagtino kun aksidente lang ba nga napusilan sa iyang kaugalingong armas si Belches. – /EIM) (BANAT NEWS)
- Latest
