Problema sa trapiko sa Minglanilla gireklamo

CEBU, Philippines - Wala’y hunong ang reklamo sa mga motorista nga mag-agian sa national highway diha sa lungsod sa Minglanilla tungod sa grabe nga kahuot sa mga sakyanan.

Kini tungod kay nibalik na usab ang kontraktor sa road concreting project sa Department of Public Works and Highways (DPWH) sa pag-ayo sa karsada kaniadtong miaging semana.

Matud ni Concordio Mejias, municipal administrator sa Minglanilla, nga nibalik na sa pag-repair sa karsada ang kontraktor sa DPWH human sa pipila ka buwan nga pagsuspenso sa proyekto tungod sa mga kalihukan sa lungsod ug sa APEC.

Gipasabot ni Mejias nga dili na gyud kaayo grabe ang problema sa trapiko nga sama kaniadto nga hapit na lang dili mosibog ang mga sakyanan nga moagi sa Minglanilla.

Kini tungod kay mipatuman ang Minglanilla og rerouting diin ang mga sakyanan mahimo nga moagi adto sa Barangay Calajoan ug lahos na sa Barangay Tungkop kun gikan ang mga motorista sa siyudad sa Sugbo paingon sa habagatan.

Matud ni Mejias nga dili angay nga basulon ang mga opisyal sa Minglanilla sa traffic problem tungod kay ang maong proyekto nga gihimo sa DPWH alang ra man usab sa katawhan aron hamugaway na ang pag-agi kun mahuman na.

Nagtuo si Mejias nga mapadali na ang kahumanan sa proyekto kay paspas na karon ang trabaho sa karsada. Ang proyekto gikatakda nga mahuman sa Disyembre 18, apan gituohan nga mahuman kini pagsayo.

 Si Mejias miingon nga makasinati lang og grabe gyud nga problema sa trapiko ang maong dapit kun adunay managsingki sa mga sakyanan nga ang masi’g ka drayber maghuwat pa og traffic enforcer nga mokuha og sketch.

Iyang gihangyo ang mga motorista nga patas-an ang ilang pasensya ug dili kay ipasuwabi ang kasuko sa mao nga sitwasyon.  (BANAT NEWS)